O Consorcio Instituto Tecnolóxico de Matemática Industrial é un consorcio público participado polas tres universidades galegas, a Universidade da Coruña, a Universidade de Santiago de Compostela e a Universidade de Vigo, que foi constituído en 2013. O Itmati ten a vocación de ser un centro de investigación tecnolóxica de referencia a nivel internacional no ámbito da Matemática Industrial. A súa principal misión é contribuír ao fortalecemento e potenciación da competitividade na contorna industrial e empresarial e apoiar a innovación no sector produtivo, mediante o logro da excelencia na investigación e o desenvolvemento de tecnoloxía matemática orientada á transferencia á industria, proporcionando solucións innovadoras aos sectores produtivos da sociedade.


O Centro conta no ano 2020 cun persoal propio de 25 persoas, das cales vinte son investigadoras. Todos os proxectos que leva a cabo Itmati céntranse en tres grandes áreas de transferencia: Simulación, Estatística e Big Data e Optimización, destacando no ano 2019 a de Simulación Numérica, que representou o 42,39% da actividade.